ەسكە سالا كەتەلىك, ازاماتتاردىڭ بۇل ساناتى 2018 جىلدىڭ شىلدە ايىنان باستاپ مزج تولەۋگە مىندەتتەلگەن بولاتىن.
ال جاڭادان ەنگىزىلگەن وزگەرىستەر 2019 جىلدىڭ قاڭتار ايىنان باستاپ كۇشىنە ەنەدى.
ەگەر ازاماتتىق-قۇقىقتىق سيپاتتاعى شارتتاردىڭ ءبىر تارابى سالىق اگەنتى, ياعني زاڭدى تۇلعالار, جەكە كاسىپكەرلەر, جەكە نوتاريۋستار, جەكە سوت ورىنداۋشىلارى, ادۆوكاتتار, كاسىبي مەدياتورلار بولاتىن بولسا, ولار جەكە تۇلعالار ءۇشىن, ولاردىڭ ىشىندە فريلانسەرلەرگە بەرىلەتىن تابىستان مزج تولەيتىن اگەنتكە اينالادى. بۇل رەتتە مىندەتتى زەينەتاقى جارنالارى الاتىن تابىستىڭ 10 پايىزى مولشەرىندە, بىراق رەسپۋبليكالىق بيۋدجەت تۋرالى زاڭمەن ءتيىستى قارجى جىلىنا بەلگىلەنگەن ەڭ تومەنگى جالاقىنىڭ 10 پايىزىنان كەم ەمەس جانە 50 ەسەلەنگەن مولشەرىنىڭ 10 پايىزىنان جوعارى ەمەس مولشەردە بەلگىلەنەدى.
ال ەگەر ازاماتتىق-قۇقىقتىق سيپاتتاعى شارتتار سالىق اگەنتى بولىپ تابىلمايتىن جەكە تۇلعالارمەن جاسالاتىن بولسا, وندا فريلانسەرلەر مزج تولەۋگە قۇقىلى بولادى. ياعني, مىندەتتى ەمەس. بۇل جاعدايدا جەكە تۇلعا مىندەتتى زەينەتاقى جارنالارىن ءوزىنىڭ ۇيعارۋىمەن قورداعى جەكە زەينەتاقى شوتىنا اۋدارا الادى. بۇل ءۇشىن ول جارنالاردى ەكىنشى دەڭگەيدەگى بانكتەر نەمەسە قازپوشتا ارقىلى «ازاماتتارعا ارنالعان ۇكىمەت» مەملەكەتتىك كورپوراتسياسىنا تولەيدى. ءارى قاراي مەملەكەتتىك كورپوراتسيا جارنالاردى قورعا اۋدارادى. اتاپ ءوتۋ كەرەك, ەگەر فريلانسەر ءوزىنىڭ وسى قۇقىعىن پايدالاناتىن بولسا, بۇل ونىڭ جەكە زەينەتاقى كاپيتالىن قالىپتاستىرۋىنا وڭ اسەر ەتەتىن بولادى.
بۇدان باسقا, ەڭبەك شارتى بويىنشا جالدامالى جۇمىسكەر رەتىندە ەڭبەك ەتەتىن ءارى جەكە تۇلعالارمەن جاسالعان ازاماتتىق-قۇقىقتىق شارتتار بويىنشا جۇمىستار ورىندايتىن نەمەسە قىزمەت كورسەتەتىن ازاماتتار ازاماتتىق-قۇقىقتىق شارتتار بويىنشا الىناتىن تابىستان مزج تولەۋدەن بوساتىلادى.
بۇل رەتتە مزج ەسەپتەۋ ءۇشىن الىناتىن ەڭ جوعارى جيىنتىق جىلدىق تابىس رەسپۋبليكالىق بيۋدجەت تۋرالى زاڭمەن ءتيىستى قارجى جىلىنا بەلگىلەنگەن ەڭ تومەنگى جالاقىنىڭ 50 ەسەلەنگەن مولشەرىنىڭ 12 ەسەلەنگەن سوماسىنان اسپاۋى ءتيىس. ياعني, 2019 جىلى جيىنتىق جىلدىق تابىس 25 500 000 تەڭگەدەن اساتىن بولسا, بۇل سومادان ارتىق الىناتىن تابىس مزج تولەۋدەن بوساتىلادى.
